Íslenska kvennalandsliðið tekur á móti því serbneska í lokaleik sínum í undankeppni HM og verður leikið á Laugardalsvelli á morgun miðvikudag klukkan 17. Þó svo að Ísland eigi ekki möguleika á því að komast í úrslitakeppnina í Kanada þá skiptir máli að ljúka keppninni á jákvæðum nótum og setja þar með tóninn fyrir undankeppni EM.
Fótbolti.net kíkti á æfingu á Laugardalsvellinum og ræddi við Frey Alexandersson, þjálfara liðsins,
„Áhorfendur munu fá að sjá góðan leik held ég. Serbneska liðið er vel spilandi og með góða einstaklinga. Við fáum sennilega hörkufótboltaleik þar sem íslenska liðið ætlar að reyna að halda áfram að bæta sinn leik," segir Freyr.
„Eftir leikinn gegn Ísrael var ég ekkert ofboðslega ánægður með margar ákvarðanir sem við tókum en svo þegar ég horfði á hann aftur var þetta aðeins betra en manni fannst strax eftir leik. Við æfðum í gær ákvarðanatökur á síðasta þriðjungi vallarins og það gekk vel. Það var mikill stígandi í því sem við vorum að gera."
Markvörðurinn, Þóra Helgadóttir, hefur gefið út að þetta verði hennar síðasti landsleikur, sá 108. í röðinni, og er hér gott tækifæri fyrir áhorfendur að kveðja hana eftir frábæran feril.
„Það væri óskandi að þessi stórkostlegi íþróttamaður fái sigur í fyrsta lagi og að hún spili góðan leik. Að mínu mati er þetta einstakur íþróttamaður að því leyti að hún hefur verið í fremstu röð rosalega lengi. Hún hefur verið í A-landsliðinu síðan 1998 og er komin með einhverja 110 A-landsleiki. Hún á skilið mikið þakklæti og hrós."
Viðtalið má sjá i heild í sjónvarpinu hér að ofan.
Athugasemdir