Riðlakeppni Meistaradeildarinnar fór af stað í dag með nokkrum skemmtilegum leikjum sem er nú öllum lokið.

Liverpool sneri aftur í deild þeirra bestu eftir nokkurra ára hlé og lenti í bullandi vandræðum á heimavelli gegn Ludogorets frá Búlgaríu.

Heimamönnum gekk ekki að skora og var Ludogorets meira að segja nálægt því að komast yfir í einhver skipti, en á 81. mínútu tókst Mario Balotelli að brjóta ísinn með sínu fyrsta marki fyrir félagið.

Ludogorets ætlaði hins vegar að fá eitthvað úr þessum leik og jafnaði metin á 90. mínútu með marki frá Dani Alabo.

En heppnin var með Liverpool í dag og fékk liðið víti seint í uppbótartíma, þar sem Steven Gerrard var ískaldur og skoraði og tryggði Liverpool sigurinn.

Borussia Dortmund var án lykilmanna á borð við Marco Reus, Nuri Sahin og Ilkay Gundogan, en tókst þrátt fyrir það að vinna góðan 2-0 sigur gegn Arsenal á Signal Iduna Park.

Ciro Immobile kom þeim þýsku í 1-0 rétt fyrir leikhlé og snemma í seinni hálfleik bætti Pierre-Emerick Aubameyang við öðru marki. Fleiri mörk voru ekki skoruð og sigur Dortmund staðreynd.

Gríska liðið Olympiakos vann óvæntan 3-2 sigur gegn silfurliði Real Madrid, og þá vann Juventus 2-0 sigur gegn Malmö frá Svíþjóð þökk sé Carlos Tevez.

Real Madrid rúllaði yfir Basel, 5-1, þar sem Gareth Bale, Cristiano Ronaldo, James Rodriguez og Karim Benzema voru allir á skotskónum.