„Síðustu tveir leikir hafa verið vægast sagt hræðilegir," sagði Stefán Gíslaon þjálfari Hauka eftir 0-6 tap heima gegn Fylki í dag en liðið tapaði líka 6-0 um síðustu helgi, þá gegn Leikni Fáskrúðsfirði úti.
Lestu um leikinn: Haukar 0 - 6 Fylkir
„Fyrir leikinn í dag fannst mér stemmningin og glampinn í augunum á strákunum réttur og að menn vildu laga og breyta því sem gerðist um síðustu helgi. Leikurinn byrjaði jafnt og var jafn þannig séð en svo koma tvær hornspyrnur og við fáum tvö mörk á okkur úr þeim og þá missum við dampinn eða trúna eða ég veit ekki hvað það er."
Haukar fengu ekki dæmda á sig aukaspyrnu í leiknum fyrr en á 65. mínútu leiksins. Segir það ekki eittvhað um hugarfar?
„Að sjálfsögðu, það er alveg hægt að segja það þannig. Mér fannst við ekki vera undir fram að fyrsta markinu, við vorum að fara í skallaboltana og berjast um annan boltann þó það hafi ekki verið aukaspyrna. Ég var ekki búinn að taka eftir því. Hvað gerist eftir fyrst og annað markið er svekkjandi."
Nánar er rætt við Stefán í sjónvarpinu hér að ofan. Hann er þar spurður út í orðróm sem heyrðist á Ásvöllum í dag þess efnis að hann ætli sér að hætta með liðið eftir tímabilið.
„Það er ekkert í kortunum. Ég ætla bara að klára þetta tímabil og svo tökum við stöðuna. Þetta er búið að vera frábært sumar og ekkert út á það að segja."
Athugasemdir