Aron Einar Gunnarsson, fyrirliði íslenska landsliðsins, var auðvitað svekktur eftir 2-1 tap liðsins gegn Tékklandi í undankeppni EM í kvöld.
Lestu um leikinn: Tékkland 2 - 1 Ísland
Ísland hafði unnið alla þrjá leiki sína í undankeppninni fram að þessum leik en Ragnar Sigurðsson gaf Íslandi forystuna áður en Tékkar jöfnuðu undir lok fyrri hálfleiks. Tékkar kláruðu síðan dæmið í síðari hálfleik eftir slæmt sjálfsmark íslenska liðsins.
,,Hvað klikkaði ekki? Feilsendingar, gefa þeim of mikið boltann og áttum í raun engin svör við þeirra sóknarleik. Þeir spiluðu sig auðveldlega í gegnum okkur alltof oft og í raun heppnir að þetta hafi ekki verið stærra," sagði Aron Einar við fjölmiðla eftir leik.
,,Þetta hefði getað dottið okkar megin einhvernvegin en við hefðum getað tapað þessu stærra líka."
,,Það var ekkert bara í vörninni heldur út um allt. Þetta var skref aftur á bak en við eigum eftir að fara vel yfir þennan leik og leikgreina hann og það eina sem skiptir máli er að í næsta leik tökum við skref fram á við."
,,Þetta er auðvitað svekkjandi og virkilega leiðinlegt fyrir fólkið sem kom alla leið hingað út til að horfa á okkur og við vorum bara ekki nógu góðir í kvöld."
Aron Einar var afar ógnandi í leiknum og voru innköst hans þá í sviðsljósinu.
,,Það er vopn, sérstaklega að hafa ekki Kára að taka innköstin og þá er annar stór inni í teig. Það er vopn og allt það en það gekk í rauninni ekkert upp í dag, svo einfalt er það."
,,Ég og Emmi vorum sofandi á fjær í fyrra markinu og sáum manninn ekki koma bakvið okkur. Við vorum staðráðnir í því að koma út í seinni hálfleik og gera betur. Seinna markið einhvern vegin fór inn en þeir hefðu getað skorað úr öðrum færum," sagði hann að lokum.
Athugasemdir