Adel Taarabt, leikmaður QPR á Englandi, hefur tjáð sig um Mario Balotelli, framherja Liverpool en hann lék með honum hjá AC Milan á Ítalíu.
Taarabt hefur lítið sem ekkert spilað með QPR á þessari leiktíð en hann á einungis tvo leiki í deild og einn leik í bikar með liðinu.
Hann var á síðustu leiktíð á láni hjá Milan frá janúar og út leiktíðina en þar lék hann með Mario Balotelli sem leikur í dag hjá Liverpool.
Lítið gengur hjá Balotelli og Liverpool þessa stundina en ítalski framherjinn hefur einungis gert tvö mörk fyrir félagið en á enn eftir að skora í deildinni.
,,Allir segja að hann sé frábær leikmaður en ég spilaði með honum og get sagt ykkur að hann er góður en ekki í heimsklassa," sagði Taarabt.
,,Hann er bara venjulegur leikmaður, hann er ekkert undur. Hann talar mikið og horfir stórt á sig en hann spilar ekki fyrir liðið. Hann hefur fengið svo mörg tækifæri, hjá City og Milan en hann hefur sóað þeim," sagði Taarabt að lokum.
Athugasemdir