Ryan Mason, fyrrum leikmaður Hull og Tottenham, sem lagði skóna á hilluna á dögunum, sagði í viðtali við Soccer AM að ef hann færi út í þjálfun væri hann til í að taka tilboði Mauricio Pochettino, stjóra Tottenham, um að ganga til liðs við þjálfarateymi félagsins.
Mason lenti í harkalegum árekstri við Gary Cahill, fyrirliða Chelsea, fyrir þrettán mánuðum þar sem hann höfuðkúpubrotnaði. Mason sagðist hafa verið tilbúinn til að koma aftur á völlinn fyrir 7-8 mánuðum síðan en hafi farið að læknisráði þar sem ekki þótti ráðlagt að hann spilaði aftur knattspyrnu.
„Ég ætla að sjá hvað gerist. Ef ég er að fara út í þjálfun þá liggur beinast við að þjálfa hjá Tottenham, þar sem ég var í 18 ár. Það er mitt félag svo ég er viss um að ef ég yrði þjálfari væri félagið í mínu DNA," sagði Mason, sem er uppalinn hjá Tottenham.
„Ég er ekki enn viss (um hvað ég ætla að gera næst). Ég ætla að sjá hvað gerist. Ég lagði skóna á hilluna fyrir fjórum eða fimm dögum svo ég ætla að eyða tíma með fjölskyldunni minni, hitta alla og sjá svo hvað ég vil gera," sagði Mason að lokum.
Athugasemdir