Gunnar Þorsteinsson, fyrirliði Grindvíkinga var niðurlútur eftir úrslitaleik Lengjubikarsins í dag en Grindavík tapaði 4-0 gegn KR.

„Við vissum að það yrði á brattan að sækja, þeir pressuðu okkur stíft. Við vörðumst vel og vorum þéttir eins og við höfum verið en náðum ekki að skapa okkur mikið fram á við. Svo fáum við á okkur mark úr aukaspyrnu sem skrifast svolítið á reynsluleysi af okkar hálfu. Róðurinn var svolítið þungur eftir það. Við mættum einfaldlega ofjörlum okkar í dag," sagði Gunnar.

Leikmannahópur Grindvíkinga var fámennur í dag en töluvert er um meiðsli hjá liðinu.

„Við erum í rauninni búnir að fara á lyginni í gegnum allt þetta mót, sérstaklega útsláttarkeppnina. Í dag vorum við með einn meistaraflokksleikmanna á bekknum og restin var annars flokks peyjar. Við förum ekki svona í Íslandsmótið, þetta var alveg tilfallandi. Við förum ekkert að hætta leikmönnum í Lengjubikarnum þótt svo þetta sé úrslitaleikur. Þó að við séum hundsvekktir í dag þá getum við verið stoltir að hafa komist alla þessa leið.

Gunnar er spenntur að hefja leik í Pepsi-deildinni.

„Fyrsta skiptið í efstu deild í fimm ár og maður finnur að það er spenna í bænum og spenna innan liðsins. Kannski ekki gerðar miklar væntingar til okkar, allavega sýnist maður það ekki út á við. Við erum búnir að sýna það núna í gegnum Lengjubikarinn að við komum til með að stríða öllum liðum í þessari deild."