Fyrsta æfing íslenska landsliðsins fyrir HM fór fram á Laugardalsvelli í dag. Fáir leikmenn eru þó komnir til æfinga ennþá en þeim á eftir að fjölga eftir því sem líða tekur á mánuðinn.

Margir leikmenn eru ennþá að spila með félagsliðum sínum og má þar nefna leikmenn á Norðurlöndunum og víðar. Þá eru þeir leikmenn sem eru nýbúnir að klára tímabil sín í stuttu fríi ennþá.

Aron Einar Gunnarsson og Gylfi Þór Sigurðsson eru síðan báðir í endurhæfingu vegna meiðsla.

Leikmennirnir sem eru mættir til æfinga eru Albert Guðmundsson, Hörður Björgvin Magnússon, Jón Daði Böðvarsson, Kári Árnason og Ólafur Ingi Skúlason.

Allur hópurinn kemur saman í lok mánaðarins en Ísland mætir Noregi og Gana í vináttuleikjum á Laugardalsvelli fyrir HM.

Hér að neðan má sjá myndband af æfingunni í dag.