Þjálfarateymi Íslands nýtir sér tæknina og Freysi getur náð talsambandi við bekkinn og einnig sent klippur sem berast gegnum spjaldtölvu.

Freysi öskraði grimmt meðan á leik stóð.

„Þú veist alveg hvernig maður er! Ég breytist aldrei. Maður var ótrúlega spenntur og búinn að leggja ógeðslega mikla vinnu í hlutina. Svo getur maður aðeins blásið þegar maður slekkur á hljóðnemanum og nýtt sér það að fjórði dómarinn sé ekki upp í stúku. Maður getur náð að lifa sig inn í leikinn," sagði Freyr við Fótbolta.net.

Þjálfarateymið prófaði þessa tækni í undirbúningsleikjunum fyrir HM.

„Það er breyting á HM að það má nota svona tæki og fleiri svona samskiptatæki á milli þeirra sem eru uppi í stúku og niðri á hliðarlínu og við vorum bara að gera tilraun hvort þetta væri eitthvað sem við vildum nota," sagði Heimir á fréttamannafundi eftir leikinn við Noregi.

„Það má í dag senda myndir og myndbönd úr leiknum inn á bekkinn og við erum að fikra okkur áfram og sjá hvort við getum nýtt þetta. Það er auðvitað gott að hafa augu uppi á vellinum sem sjá betur, lélegustu sætin á bekknum eru varamannabekkurinn. Þeir sem eru hærra á vellinum sjá betur opnu svæðin en í þessum leikjum er mjög erfitt að koma skilaboðum inn á völlinn, það breytist aldrei."

Leikgreinandateymi Íslands er nú á fullri ferð að vinna í því að skoða nígeríska liðið sem við mætum á föstudaginn.

„Vinnuferlið er það sama en þetta er allt öðruvísi lið sem við fáum upp í hendurnar," segir Freyr og segir það hjálpa mikið að hafa Roland Anderson í teyminu en hann þekkir kúltúrinn hjá Nígeríu vel sem fyrrum aðstoðarlandsliðsþjálfari liðsins.

Sjá einnig:
Roland í 5. skipti á HM - 100% viss á að Ísland geti farið áfram