Það var allt annað að sjá til Íslands frá því í leiknum gegn Ísrael á laugardag og Arna Sif segir að íslensku stúlkurnar hafi verið staðráðnar í að bæta sig.

„Við fórum ótrúlega vel yfir það eftir Ísraelsleikinn. Við vorum ósátt með nýtinguna og vorum staðráðin í að bæta þetta, ákvarðanatöku á síðasta þriðjungi og við gerðum það ótrúlega vel og það gekk allt upp í dag.“

Arna Sif hefur verið í kringum landsliðshópinn en fékk í dag tækifæri í byrjunarliðinu í fyrsta skipti. Hún segist hafa stefnt að því lengi.

„Þetta er náttúrulega það sem maður er búinn að vera að stefna að frá því að maður var lítil stelpa þannig að loksins. Þetta er draumur og þetta var ógeðslega gaman.“

Báðir miðverðirnir, Arna Sif og Glódís Perla, skoruðu í dag og mörk þeirra voru jafnframt fyrstu landsliðsmörk beggja. Þær stöllur voru þekktar fyrir markaskorun í yngri flokkunum og það var gaman að sjá þær komast á blað í kvöld.

„Það var ótrúlega skemmtilegt. Ég var búin að ákveða í morgun að ég ætlaði að skora þannig að það var mjög skemmtilegt. Við Glódís leynum á okkur í sókninni. Maður var þarna í yngri flokkunum, fremstur, þannig að maður kann þetta alveg.“

Nánar er rætt við Örnu Sif í sjónvarpinu hér að ofan.