Lestu um leikinn: Slóvakía U21 3 -  1 Ísland

„Það var virkilega gaman að fá tækifærið og ég naut þess að spila þennan leik. Þetta var skemmtilegur leikur," sagði Haukur Heiðar við Fótbolta.net.

Haukur fékk góða dóma fyrir spilamennsku sína og gengur hann sáttur frá borði.

„Ég var þokkalega sáttur, maður var kannski smá "shaky" í byrjun, gerði ein mistök snemma þar sem ég var pressaður og missti boltann, annars var ég sáttur," sagði Haukur og var hann nokkuð ánægður með fyrirgjafirnar sínar. Hann viðurkennir að úrslitin hafi verið furðuleg miðað við gang leiksins fram að jöfnunarmarki heimamanna.

„Við erum bara með þennan leik alveg fannst mér, við vorum búnir að spila vel og opna þá. Ég veit ekki alveg hvort þetta var rangstaða þegar Alfreð skoraði, annars fannst mér við vera alveg með þennan leik. Svo skora þeir eitthvað heppnismark, Ömmi sagðist vera kominn með báðar hendurnar á boltann þannig það á að vera brot. Svo skora þeir annað heppnismark þegar boltinn fer í varnarmann og í boga yfir Ögmund."

Haukur átti einmitt sendinguna á Alfreð þegar hann skoraði og var dæmdur rangstæður. Var ekkert freistandi að láta vaða frekar en að gefa boltann?

„Yfirleitt þegar ég er í þessari stöðu hugsa ég um sendinguna fyrst og þegar ég sá Alfreð var ég alltaf að fara að gefa hann. En ég sá svolítið eftir því að hafa ekki skotið," sagði Haukur léttur.