„Við vorum ekki komnir inn í leikinn. Völlurinn er hægur og hitinn hérna inni mikill svo tempóið var hægt, það hægðist á öllu. Við þurftum að breyta hugarfarinu og fá hraðari leik," segir Kristján eftir leik.

Ungur leikmaður sem lék með KFS í fyrra, Breki Ómarsson, skoraði sigurmarkið.

„Breki er alinn upp í Vestmannaeyjum á lýsi og sultu. Hann er að koma upp í yngra starfið. Hann meiddist fyrir um ári síðan og er að vinna sig til baka. Við erum að reyna að búa til framtíðarframherja fyrir ÍBV úr honum."

Kristján tók við ÍBV í haust og er fluttur til Vestmannaeyja.

„Ég flutti í upphafi árs og það er gríðarlega gaman. Ég er ánægður með að hafa tekið þá ákvörðun að vera á svæðinu svona mikið og strax."

Hvernig er staðan á leikmannahópnum í dag? Er Kristján ánægður með þetta eins og staðan er?

„Við erum ekki að leita að leikmönnum og erum tilbúnir með þennan hóp til að fara inn í mótið. Ef okkur finanst vera hnökrar eða eitthvað kemur upp á erum við tilbúnir að bregðast við því. Núna vinnum við á þessum hóp. Við erum með stóran hóp og reynum að skipta mönnum inn snemma til að sjá hvað þeir hafa upp á að bjóða. Staðan er nokkuð góð og lítið um meiðsli."

Sóknarmaðurinn Gunnar Heiðar Þorvaldsson var nýlega ráðinn spilandi aðstoðarþjálfari ÍBV en þetta er hans fyrsta þjálfaraverkefni.

„Hann er að koma inn af krafti og er að mennta sig í þjálfun. Hann er að koma inn af krafti og er fullur af hugmyndum og orku," segir Kristján sem vonast til að Gunnar nýtist sem best innan sem utan.

„Hann er á það háum launum að það þýðir ekki annað en að taka nóg út hjá honum," segir Kristjan kíminn.