Chelsea færðist enn nær enska meistaratitlinum með því að vinna 1-0 sigur gegn Manchester United í baráttuleik á Stamford Bridge en góður dómari leiksins, Mike Dean, var að flauta til leiksloka.

Mark Eden Hazard í fyrri hálfleik tryggði Chelsea stigin þrjú en Radamel Falcao tapaði boltanum í aðdragandanum og Oscar átti glæsilega hælsendingu á Belgann sem skoraði gegnum klofið á David de Gea.

Varnarmúr Chelsea var erfiður viðureignar fyrir Rauðu djöflanna. Falcao fékk færi til að jafna metin í seinni hálfleik en skaut í utanverða stöngina.

Chelsea er með tíu stiga forystu á Arsenal sem er í öðru sæti. Manchester United er í þriðja sætinu.