Alexis Sanchez skoraði bæði mörk Arsenal sem vann 2-1 sigur gegn B-deildarliði Reading í undanúrslitum enska bikarsins í dag. Sigurmarkið kom í framlengingu.

Adam Federici, markvörður Reading, hafði átt frábæran leik en breyttist á augabragði úr hetju í skúrk þegar hann gerði hræðileg mistök í sigurmarki Arsenal en hann missti boltann á afar klaufalegan hátt í gegnum klofið á sér og inn.

Arsenal er ríkjandi bikarmeistari og mun leika gegn Aston Villa eða Liverpool í úrslitum. Hinn undanúrslitaleikurinn fer fram á morgun klukkan 14.