Það var markaveisla í C deild Lengjubikarsins í kvöld þegar Ýmir vann stórsigur á Úlfunum í lokaleik liðanna í riðlakeppninni.

Birgir Magnússon kom Ými yfir strax á 1. mínútu. Samúel Arnar Kjartansson skoraði annað mark leiksins á 4. mínútu.

Hörður Magnússon kom Ými í 3-0 á 22. mínútu og í kjölfarið opnuðust flóðgáttir. Þegar dómarinn flautaði til hálfleiks var staðan orðinn 9-0.

Markaregnið hélt áfram í síðari hálfleik. Samúel Arnar Kjartansson bætti við tveimur mörkum áður en Björn Þórsson Björnsson kom inn á og skoraði þrennu á 6 mínútum.

Á 81. mínútu var staðan orðin 15-0. Á síðustu tíu mínútunum bættu Ýmismenn við 7 mörkum og unnu leikinn 21-0. Samúel Arnar Kjartansson leikmaður Ýmis gerði sér lítið fyrir og skoraði 10 mörk í leiknum.

Ýmismenn fara með sigrinum upp fyrir Kórdrengi í efsta sæti riðilsins og fara því áfram í undanúrslit keppninnar.