Brasilíski varnarmaðurinn Dante hjá Bayern München hlakkar til að mæta sínum gömlu félögum í Mönchengladbach í dag en ætlar þó ekki að færa þeim neinar gjafir.
Þessi öflugi leikmaður gekk í raðir Bayern München síðasta sumar frá Mönchengladbach og nú mun hann mæta á sinn gamla heimavöll þegar liðin eigast við í lokaumferðinni í þýsku úrvalsdeildinni í dag klukkan 13:30.
Þessi öflugi leikmaður gekk í raðir Bayern München síðasta sumar frá Mönchengladbach og nú mun hann mæta á sinn gamla heimavöll þegar liðin eigast við í lokaumferðinni í þýsku úrvalsdeildinni í dag klukkan 13:30.
,,Þetta er vissulega mjög sérstakt. Ég hlakka virkilega til að sjá vini mína og stuðningsmennina aftur," sagði Dante.
,,En við förum klárlega þangað til að vinna, við verðum klárir í slaginn."
Dante hefur átt stóran þátt í velgengni Bayern á tímabilinu en eftir komu hans hefur vörn liðsins verið mjög stöðug og hefur liðið aðeins fengið 15 mörk á sig í deildinni.
Hann vann þýsku úrvalsdeildina með Bayern á tímabilinu og á möguleika á að vinna tvo titla í viðbót áður en tímabilinu lýkur, Meistaradeildina og þýska bikarinn. Þá hefur hann verið valinn í brasilíska landsliðið fyrir Álfukeppnina í næsta mánuði.
Jupp Heynckes, þjálfari Bayern, getur ekkert annað en lofsamað frammistöðu hans í ár.
,,Frammistaða hans er ein af megin ástæðum þess að við höfum fengið svo fá mörk á okkur," sagði Heynckes.
Dante hefur spilað 43 leiki á tímabilinu og skorað eitt mark.
