,,Ég ætla ekki að hætta þó að fólk vilji að ég hætti"
Edda Garðarsdóttir.
Ólína Guðbjörg Viðarsdóttir og Edda.
Edda Garðarsdóttir og Ólína Viðarsdóttir eru að reyna að losna undan samningi hjá Chelsea og stefna á að flytja heim til Íslands.
Edda og Ólína sömdu við Chelsea í janúar síðastliðnum en þær eru ekki ánægðar í herbúðum félagsins.
Edda og Ólína sömdu við Chelsea í janúar síðastliðnum en þær eru ekki ánægðar í herbúðum félagsins.
,,Við erum að reyna að losna. Ólína sótti um góða vinnu heima og fékk hana en síðan er fullt af öðrum atriðum sem spila inn í," sagði Edda í samtali við Fótbolta.net í dag.
,,Þeir lofuðu okkur hinu og þessu og síðan var það kjaftæði. Við stóðum í ströngu við að fá einföldustu hluti í lag og þeir komu aldrei í lag."
Þrátt fyrir að leika í efstu deild á Englandi æfir lið Chelsea oft ekki nema einu sinni eða tvisvar í viku. Það kunna Edda og Ólína illa að meta.
,,Við erum ekki alveg til í að æfa 1-2 í viku. Það eru nánast allar í fullri vinnu nema landsliðsmennirnir. Það er ein sem bjó í Wales og þurfti að keyra góða fjóra tíma aðra leið til að komast á æfingu svo hún æfði bara einu sinni í viku."
,,Þetta er í London og ef einhver í liðinu býr í Norður-London og ætlar að komast á æfingu eftir vinnu þá tekur það tvo tíma. Klúbburinn er heldur ekki að setja alltof mikinn pening í þetta og þeir eru bara aðeins eftir á."
Edda og Ólína stefna á að losna frá Chelsea og spila áfram í Pepsi-deildinni.
,,Ég ætla ekki að hætta þó að fólk vilji að ég hætti, Kolbeinn Tumi og félagar. Ég hætti á mínum forsendum," sagði Edda.
Edda staðfesti að hún og Ólína hafi rætt við félög í Pepsi-deildinni en þær æfðu meðal annars með Val á dögunum.
