Heimir Hallgrímsson, landsliðsþjálfari, nefndi það stuttlega á fréttamannafundi fyrir leikinn gegn Argentínu að hann hefði farið í smá fýlu tveimur dögum fyrir leik.
„Ég er með stuðningsnet. Ég fór aðeins í fýlu í gær en það voru menn sem pikkuðu mig upp og hristu mig aðeins," sagði Heimir á fréttamannafundinum og þakkaði starfsliði sínu um leið.
Í Morgunblaðinu í dag er viðtal við Heimi þar sem hann útskýrir af hverju hann fór í fýlu.
„Þegar spennan er að byggjast upp þá eru það oft litlir hlutir sem verða til þess að pirra mann. Þess vegna er svo mikilvægt að það sé allt á hreinu og allt undirbúið. Það var einhver skjávarpi sem klikkaði, og mér fannst það ekki vera viðeigandi í aðdraganda leiks á HM að landsliðið væri með bilaðan skjávarpa,“ sagði Heimir við Morgunblaðið.
„Þetta var ekkert vandamál eftir á, en þráðurinn er stuttur þegar það er mikið undir.“
Athugasemdir