Blikar kláruðu Framara á fimmtán mínútum en öll þrjú mörk liðsins komu á sex mínútna kafla undir lok leiks.

,,Kannski fullstórt tap og mér fannst við lélegir í fyrri hálfleik en eigum samt tvö mjög fín tækifæri til að skora.Við komum ekki sterkir inn í seinni hálfleikinn en það er eins og við séum að vinna okkur inn í hann, gefum svo mark og svo annað mark og annað mark," sagði Bjarni við fjölmiðla í kvöld.

,,Það er erfitt við það að etja ef við ætlum að gefa svona mörk á okkur og það eru bara einstaklingsmistök sem gefa þrjú mörk í þessum leik."

Árni Vilhjálmsson skoraði mjög svo umdeilt mark á 78. mínútu, markið sem má segja að hafi verið vendipunktur leiksins. Aukaspyrna var dæmd á Blika og sendi Hafsteinn Briem boltann í átt að Denis Cardaklija, markverði Fram, en Árni hljóp inn í sendinguna og skoraði.

,,Þarna kemur þetta aðeins inn í skilninginn. Ef þú horfir á látbragð leikmanna, hvað þeir eru að gera. Hann er aldrei að taka aukaspyrnuna, ef hann er að taka hana þá sendir hann á hann þéttingsfast. Hann skilur hann ekki eftir miðja leið á milli, hann ætlar að láta hann fá boltann og sparkar að vísu í hann."

,,Hann hefði getað stoppað leikinn og látið hann taka aftur og það hefði enginn kvartað yfir því en þetta var mistök af okkar hálfu. Ég vil meina að hann hafi getað gert bæði, hann hefði getað stoppað en gat líka látið þetta fara eins og þetta fór," sagði Bjarni ennfremur.