Gunnleifur, sem hefur verið einn besti maður Blika á þessu tímabili, hefur ákveðið að framlengja samning sinn um eitt ár við félagið en hann er elsti leikmaður efstu deildar.

Hann hefur verið í algeru lykilhlutverki hjá félaginu frá því hann kom frá FH árið 2013 en hann hefur leikið 103 leiki til þessa.

Ljóst er að hann tekur alla vega eitt tímabil til viðbótar með liðinu en fátt bendir til þess að hann muni hætta á næstu árum. Hann hefur ítrekað sagt að honum finnst gaman að spila fótbolta og að honum líði vel líkamlega.

Hann hefur þá leikið 26 landsleiki fyrir hönd íslenska landsliðsins og samtals spilað 398 leiki í deild- og bikar á ferlinum. Hann hefur einu sinni skorað og var það með HK í 2. deildinni árið 2002.

Einlægt hamingjusamur að hafa framlengt samninginn minn við Breiðablik um ár. Hætti aldrei😎. #blix 💚 pic.twitter.com/SxynwtDwa9

— G Gunnleifsson (@GulliGull1) August 18, 2017