„Já já svona bæði og við klúðruðum líka ansi mörgum færum í dag, en ég meina 8-0 er alltaf ásættanlegt" sagði Hallbera aðspurð um hvort hún væri sátt eftir leikinn.
Lestu um leikinn: Ísland 8 - 0 Færeyjar
„Maður var alltaf með það á bak við eyrað að markatalan skipti máli en ég held að við getum ekki kvartað þannig séð, við höldum hreinu og skorum fullt af mörkum. Við bara verðum að halda áfram á þessari braut á móti þeim liðum sem eru slakari."
Íslenska liðið setti tóninn strax í upphafi og skoraði fyrsta mark leiksins eftir aðeins tveggja mínútna leik. Þetta mark hafði sitt að segja um framhald leiksins að mati Hallberu: „Já, það er alltaf mjög gott þegar lið liggja svona aftarlega að brjóta þau strax niður."
Leikurinn í kvöld var fyrsti leikur Íslands eftir EM, leikmenn voru að vonum glaðir að fá flottan sigur eftir viss vonbrigði þar úti í sumar.
„Það var mjög gott að hrista af sér vonbrigði sumarsins, fullt af fólki á vellinum, það var bara mjög gaman að spila í kvöld, þetta var bara mjög skemmtilegt, ég vona bara að þessi keppni haldi áfram á svipuðum tónum."
Nánar er rætt við Hallberu í spilaranum hér að ofan.
Athugasemdir