Ólafur Páll Snorrason.
Ólafur Páll Snorrason var á dögunum ráðinn aðstoðarmaður Heimis Guðjónssonar, þjálfara FH. Ólafur snýr aftur í Krikann þar sem hann var sigursæll sem leikmaður áður en hann gerðist spilandi aðstoðarþjálfari Fjölnis og var þar í tvö ár.
„Ég er FH-ingur og mun alltaf verða. Þar af leiðandi er ég mjög sáttur með það tækifæri sem mér bauðst til að koma aftur," segir Ólafur.
„Það var erfitt eins og oft er. Ég var að yfirgefa félag sem ég hef mikil tengsl við en er gríðarlega ánægður með að vera kominn hingað aftur."
FH stefnir á Íslandsmeistaratitil á hverju ári en í Hafnarfirði vilja menn enn meira.
„Það er ekkert launungarmál með það. Við stefnum hátt. FH hefur ekki náð að vinna báðar dollurnar á sama tímabili og það er eitt af okkar markmiðum. Við stefnum alltaf vel í að gera vel í Evrópukeppninni. Við eigum okkur allir stóra drauma og við erum í ákveðnu færi til að láta þá drauma rætast."
Reynsluboltinn Veigar Páll Gunnarsson samdi við FH-inga í dag.
„Fyrir utan frábæran fótboltamann erum við að fá skemmtilegan náunga og afbragðs karakter í hóp. Við vitum alveg hvað Veigar hefur fram að færa og erum þess vegna gríðarlega ánægðir með daginn. Þetta er frábær fótboltamaður og við vitum hvað hann getur gert fyrir okkur innan sem utan vallar," segir Ólafur en viðtalið má sjá í sjónvarpinu hér að ofan.
Athugasemdir
