„Það er mér mikilvægt að þeir skilji ástæðuna fyrir því að ég yfirgef Stjörnuna. Það er ekki vegna þess að mér dauðlangaði það. Það var möguleiki að vera áfram í Stjörnunni en fyrst ég fékk svona lítinn spiltíma á síðustu leiktíð þurfti ég að pæla í hvernig spiltíminn yrði næsta ár," segir Veigar sem segir að viðskalnaðurinn við Stjönuna hafi verið erfiður.

„Ég þurfti að hugsa mig um í nokkurn tíma og spá í hvað væri best fyrir mig. Ég þurfti að vera smá sjálfselskur. Ég vona að ég hafi tekið rétta skrefið. Ég er gríðarlega stoltur af því að vera kominn í FH."

Spila ekki 90 mínútur í hverjum leik
Það fyrsta sem kemur upp í huga Veigars þegar hann er spurður að því hvað hann vilji gera með FH er að vinna titil.

„Mitt hlutverk er að vera hér sem leikmaður og gefa af mér til yngri leikmanna. Ég er svo sannarlega klár í það verkefni. Ég er staðráðinn í að leggja mig 100% fram með FH," segir Veigar.

„Ég kem væntanlega með einhverjar nýjungar í sóknarleiknum og vonandi getur það skemmt áhorfendum."

„Ég fæ ákveðið hlutverk í liðinu og ég veit að þeir (þjálfararnir) hafa mikið álit á mér sem fótboltamanni. Við höfum rætt mitt hlutverk og ég verð ekki að spila 90 mínútur í hverjum leik, það á að nota mig rétt."

Stefnir á meistaraflokksþjálfun
Veigar er ekki bara að fara að spila með FH-ingum, hann fær starf í akademíu FH og segist spenntur fyrir því að fara í þjálfun.

„Þetta er nýtt fyrir mér en er krefjandi og ég hlakka til að byrja þar. Á endanum langar mér að verða þjálfari í Pepsi-deildinni eða eitthvað slíkt. Það er eitthvað sem ég vona að rætist í framtíðinni," segir Veigar.

Sjáðu viðtalið í heild sinni í sjónvarpinu hér að ofan.