„Við fáum hérna tvo hörkuleiki á útvelli og mikilvægt fyrir okkur að fá eitthvað út úr þessum leikjum. Bæði stig og góða frammistöðu,“ sagði landsliðskonan Glódís Perla Viggósdóttir aðspurð um komandi verkefni Íslands í undankeppni Heimsmeistaramótins. Ísland mætir Þýskalandi á föstudag og Tékklandi næstkomandi þriðjudag.
Við hverju má búast?
„Tveimur hörkuleikjum. Við erum að fara spila á móti Þýskalandi sem er eitt besta lið í heimi og búið að vera í mörg ár. Er með algjöra hefð og allt á baki sér. Á móti komum við, litla Ísland. Maður vill reyndar ekki segja litla Ísland en þær eru líklegri en við og með pressuna á sér. Svo spilum við á móti Tékkum sem eru búnar að vera á uppleið og eru með gott lið. Það verður bara jafn leikur og mjög spennandi verkefni.“
Lið Þýskalands hefur verið yfirburðalið í heimsboltanum. Sigursælt á Evrópu- og Heimsmeistaramótum og er í öðru sæti heimslistans.
Á Ísland einhvern möguleika gegn svo sterku liði?
„Ef við mætum til leiks og gerum allt sem við leggjum upp með þá hef ég fulla trú á að við getum gert góða hluti í þessum leik. En við verðum allar að vera 100% annars verður þetta mjög erfitt fyrir okkur,“ sagði Glódís meðal annars um andstæðingana.
Glódís hefur verið í eldlínunni með nýja félaginu sínu Rosengård og mætir því til leiks í góðu standi. Henni líður vel hjá nýja klúbbnum og hefur gaman af því að takast á við nýjar áskoranir.
„Mér líður mjög vel og þetta er áskorun fyrir mig. Það er mikið búið að vera í gangi síðan ég kom og svona öðruvísi og bara gott fyrir mig að takast á við þetta.“
Nánar er rætt við landsliðsmiðvörðinn öfluga í spilaranum hér að ofan.
Athugasemdir