Sísí var spræk á æfingu í morgun
„Markmiðið okkar er alltaf að ná í tvo sigra en fjögur stig yrðu flott,“ sagði landsliðskonan Sigríður Lára Garðarsdóttir í samtali við Fótbolta.net fyrir æfingu Íslands í morgun. Íslenska liðið undirbýr sig nú af fullum krafti fyrir tvo mikilvæga leiki gegn Þýskalandi og Tékklandi í undankeppni Heimsmeistaramótsins.
Þýska liðið er eitt það albesta í heiminum en Sísi segir að Ísland geti staðist þeim snúning er kemur að baráttunni og er tilbúin að takast á við þær þýsku.
„Ég held að við séum alveg tilbúnar í það. Við erum akkúrat liðið í að tækla og berjast.“
Nokkrar vikur eru síðan keppni í Pepsi-deildinni lauk en Sísí er nýkomin frá Noregi þar sem hún æfði með norska úrvalsdeildarliðinu Valerenga ásamt Ingibjörgu Sigurðardóttur. Þar sem þær hittu fyrir samherja sinn hjá landsliðinu, Gunnhildi Yrsu Jónsdóttur. Sísí er því í góðu formi fyrir komandi verkefni.
„Við vorum að æfa með Valerenga. Liðinu hennar Gunnýjar. Freysi hafði samband og þetta var kjörið tækifæri til að sjá eitthvað nýtt. Þarna eru toppaðstæður og liðið er mjög gott. Það var gaman að prófa eitthvað nýtt,“ sagði Sísí meðal annars en hún er jákvæð fyrir því að reyna fyrir sér á erlendri grundu í framtíðinni. Nánar er rætt við Sísí í spilaranum hér að ofan.
Athugasemdir
