Breiðablik lék á als oddi í fyrsta leik Bose mótsins í dag, laugardag. Mótið er haldið af Nýherja og er fyrsti þátturinn af undirbúningstímabilinu hjá nokkrum Pepsi-deildarliðum.

Blikar mættu Víkingi R. í Fífunni í morgun.

Bæði lið tefldu fram blöndu af ungum mönnum og reyndum. Víkingar voru með nokkra leikmenn á reynslu, Sindra Scheving frá Val, færeyskan miðvörð sem heitir Hörður A. Askham og serbneskan framherja, Filip Djordjevic, sem hefur spilað undanfarin ár í Færeyjum. Þá spilaði Gunnlaugur Hlynur Birgisson leikmaður Víkings Ólafsvíkur með þeim en hann hefur átt í viðræðum við Víking R..

Gísli Eyjólfsson kom Breiðbliki yfir á 18. mínútu og eftir það litu þeir grænklæddu ekki til baka.

Lokatölur urðu 8-1! Willum Þór Willumsson skoraði þrennu fyrir
Blika og Gísli Eyjólfsson var með tvö. Hjá Víkingum skoraði Filip Djordjevic, serbneski framherjinn, sem er á reynslu hjá félaginu.

Leikurinn í dag var sýndur á SportTv.