Malen, Maguire, Rashford, Greenwood, Yoro, Eriksen og fleiri góðir í slúðri dagsins
banner
   mán 18. desember 2017 16:27
Magnús Már Einarsson
Gervigras verður lagt á aðalvöll Fylkis (Staðfest)
Frá undirritun samningsins í dag.
Frá undirritun samningsins í dag.
Mynd: Fótbolti.net - Hafliði Breiðfjörð
Ákveðið hefur verið að leggja gervigras á aðalvöll Fylkis í Árbænum. Gengið var frá samningi þess efnis í dag en Dagur B. Eggertsson borgarstjóri og Björn Gíslason formaður Fylkis undirrituðu samkomulagið.

Fylkir bætist því í hóp með Val og Stjörnunni sem leika einnig heimaleiki sína á gervigrasi í Pepsi-deild karla. Fylkir leikur á gervigrasvelli næsta sumar en ýmislegt annað í tengslum við völlinn verður einnig tekið í gegn næsta sumar.

„Reykjavíkurborg tekur að sér að leggja gervigras ásamt nauðsynlegu undirlagi með snjóbræðslukerfi og vökvunarkerfi á aðalvöll félagsins og koma fyrir flóðlýsingu. Einnig verður annað sem tilheyrir vellinum svo sem girðingar, vallarklukka, mörk og varamannaskýli endurnýjað. Fylkir sér um að ljúka ýmsum nauðsynlegum framkvæmdum við völlinn í tengslum við áhorfendasvæði," segir í tilkynningu frá Fylki.

„Gert er ráð fyrir að framkvæmdum verði lokið seinnihluta næsta árs. Völlur og búnaður verður eign Reykjavíkurborgar að framkvæmdum loknum og mun borgin annast rekstur vallarins, líkt og er með aðra gervigrasvelli á svæðum íþróttafélaga í borginni."

„Æfingasvæði milli Hraunbæjar og Bæjarháls sem Fylkir hefur nýtt verður ekki notað sem slíkt eftir að gervigras er komið á aðalvöll félagsins. Reykjavíkurborg mun selja byggingarrétt á þeim lóðum sem þar losna."

„Sameiginlegur stafshópur Fylkis og Reykjavíkurborgar vinnur að þarfagreiningu vegna samstarfssamnings um framtíðaraðstöðu félagsins og á tillaga að liggja fyrir í febrúar."

Athugasemdir
banner
banner
banner
banner