Tveimur leikjum er lokið í Lenjgubikar kvenna í dag. Leikirnir voru í A-deild og C-deild, en alls voru skoruð 11 mörk í þessum tveimur leikjum.

Í A-deildinni var hörkuleikur þegar Íslandsmeistarar Stjörnunnar heimsóttu Þór/KA fyrir norðan. Leikurinn fór fram í Boganum á Akureyri.

Stjörnukonur byrjuðu betur og eftir tíu mínútur var Guðmunda Brynja Óladóttir búin að skora. Guðmunda Brynja kom til Stjörnunnar frá Selfossi í október.

Zaneta Wyne náði að jafna fyrir Þór/KA á 18. mínútu og staðan í hálfleik var 1-1. Í upphafi seinni hálfleiks náði Guðmunda Brynja að skora aftur og koma Stjörnunni aftur yfir.

Það virtist allt stefna í góðan sigur Garðbæinga, en þegar lítið var eftir jafnaði Rakel Sjöfn Stefánsdóttir og jafntefli var niðurstaðan.

Í C-deildinni átti Augnablik ekki í vandræðum með Víking Ó. Augnablik vann 7-0 sigur og náði í sín fyrstu stig.