Þrjár sprengjur sprungu við liðsrútuna á þriðjudaginn í síðustu viku fyrir heimaleikinn gegn Mónakó. Leikurinn var settur á daginn eftir og tapaði Dortmund 2-3.

Tuchel sagði að leikurinn hefði verið færður án samráðs við leikmenn en menn séu núna komnir í andlegt jafnvægi.

„Allt sem gerðist í síðustu viku hefur gert okkur sterkari. Við þurfum að ná fram góðum leik og ég er viss um að við getum gert það. Við erum tilbúnir og einbeittir. Við vitum að þetta verður mjög erfitt en við höfum kraftinn og sjálfstraustið til að ná úrslitum," sagði Tuchel.

Marc Bartra, varnarmaður Dortmund, meiddist í árásinni og er talið að hann verði frá í um mánuð í viðbót.

Sú ákvörðun UEFA að færa fyrri leikinn aðeins aftur um einn dag hefur verið harðlega gagnrýnd.

Seinni leikurinn hefst 18:45 í kvöld í Mónakó.