Heimild: Morgunblaðið
Miðvörðurinn Sölvi Geir Ottesen gæti farið í Pepsi-deildina samkvæmt frétt Morgunblaðsins.
Hann hefur gengið frá starfslokasamningi við Buriram United í Tælandi eins og greint var frá í gær. Hann gekk til liðs við Buriram fyrir tímabilið en félagið bauð honum starfslokasamning þegar það fékk annan evrópskan leikmann til baka úr láni. Kvóti er á fjölda erlendra leikmanna í tælensku deildinni.
Sölvi er uppalinn hjá Víkingi í Reykjavík ásamt því að hafa leikið fyrir KA í yngri flokkum. Íslandsmeistarar FH reyndu að fá miðvörð áður en lokað var fyrir félagaskiptagluggann og er talið líklegt að þeir hafi áhuga á að fá Sölva.
Sumarglugginn fyrir félagaskipti hér á landi opnar um miðjan júlí.
Sölvi mun vera með það á stefnuskránni að flytja heim en samkvæmt heimildum er þó möguleiki á að hann geri annan skammtímasamning við erlent félag áður en hann kemur alkominn til Íslands.
Sölvi er 33 ára og á 28 A-landsleiki. Síðasti keppnisleikur hans fyrir Ísland kom í október 2015, í 2-2 jafntefli gegn Lettlandi. Hann var ekki valinn í hópinn sem fór á EM í fyrra.
Athugasemdir