Alfreð Elías Jóhannsson þjálfari Selfyssinga var temmilega sáttur með stigið sem liðið fékk gegn toppliði ÞÓR/KA í Pepsi deildinni. Gestirnir frá Akureyri fengu urmul af góðum færum en náðu ekki að nýta sér það og koma boltanum í netið. Alfreð var ánægður með varnarleikinn í kvöld.
Lestu um leikinn: Selfoss 0 - 0 Þór/KA
„Mjög gott að fá þetta stig, bara frábært. Við unnum fyrir því. Þær létu okkur hlaupa og við vissum að þær myndu vera meira með boltann en við vorum skipulagðar og héldum því vel. Þetta gekk bara ágætlega."
„Við vorum að reyna að loka á Mayorinn, aðeins að láta hana hafa fyrir hlutunum og hún fékk alveg að gera það. Við náðum að jafnvel tvídekka eða þrídekka hana á tímabili en það losnaði kannski aðeins um aðrar á meðan. Það gekk vel, markmaðurinn góður, línan góð og miðjumennirnir frábærir."
Selfyssingar fengu líka tækifæri til þess að koma boltanum í netið en sóknarleikurinn hefur sennilega oft verið betri en í kvöld.
„Já, sendingarnar voru ekki nógu góðar á síðasta þriðjung en við fengum möguleika til þess að skapa okkur enn betri færi en við erum alltaf að reyna að leita að þessari úrslitasendingu staðin fyrir að fara 2-3 skref lengra."
Viðtalið við Alfreð má sjá í heild sinni hér að ofan.
Athugasemdir
