„Við vorum drullusvekktar í gær og auðvitað erum við smá svekktar enn. Nú þarf bara að hugsa eins og alvöru íþróttamaður og láta þetta ekki á sig fá," segir Elín Metta Jensen, leikmaður íslenska liðsins.
Elín kom inn sem varamaður í gær og fékk dæmda á sig vítaspyrnu skömmu síðar.
„Frá minum bæjardyrum séð er þetta ekki víti. Mér finnst hún bara bakka í mig og detta. Það var lítið sem ég gat gert í þeim aðstæðum. Mér fannst þetta klárlega ekki víti."
Amandine Henry, leikmaður Frakklands, nældi í vítaspyrnuna en hún og Dagný Brynjarsdóttir eru samherjar hjá Portland Thorns. Elín Metta segir að Dagný hafi sagt við sig eftir leik að Henry væri gjörn á að fiska.
„Það var augljóst hvað hún var að gera þarna. Þetta er reyndur leikmaður og kannski var hún svolítið klók."
Elín Metta var ansi niðurdreginn eftir leikinn og fór ekki í viðtöl að honum loknum. Hún var þó brött fyrir æfingu í morgun og spjallaði við alla fjölmiðla.
„Það eru miklar tilfinningar og auðvitað var ég hundsvekkt með þessi úrslit. Þetta er ekki auðvelt. En eins og stelpurnar segja þá erum við saman í þessu og ég ætla að horfa á það þannig," segir Elín Metta.
Viðtalið má sjá í sjónvarpinu hér að ofan.
Fótbolti.net er með öflugt teymi í Hollandi og er hægt að fylgjast með öllu bak við tjöldin á Snapchat (Fotboltinet), á Instagram og öðrum samskiptamiðlum okkar.
Leikir Íslands á EM:
Ísland 0-1 Frakkland
Ísland 1-2 Sviss
Ísland 0-3 Austurríki
Athugasemdir