Andrea Ranocchia, varnarmaður Internazionale á Ítalíu, vanmetur ekki Stjörnuliðið fyrir leik liðanna í Evrópudeildinni á morgun en leikurinn verður háður á Laugardalsvelli.
Ranocchia sat fyrir svörum á Laugardalsvelli fyrir nokkrum mínútum síðan en hann virkaði afar hógvær.
Hann var meðal annars spurður út í stöðu hans hjá ítalska landsliðinu og þá segir hann að þessi leikur eigi lengi eftir að vera í minnum Stjörnumanna.
,,Á morgun verður þetta leikur sem er lífstíðarleikur fyrir Stjörnumenn en þeir vilja leggja mikla áherslu á það að komast áfram. Þetta verður líka erfiður leikur fyrir okkur því við viljum komast áfram," sagði Ranocchia.
,,Það er skylduverkefni að vinna báða leikina og við leggjum mikla áherslu á að komast áfram í Evrópudeildinni."
Ranocchia vonast til þess að komast aftur í ítalska landsliðið en með góðri frammistöðu á komandi tímabili ætti það að takast.
,,Auðvitað en það fer eftir því hvernig liðinu mun ganga í ár og hvernig liðið mun standa sig. Vonandi kemst ég aftur í bláa búninginn," sagði hann að lokum.
Ranocchia verður að öllum líkindum í miðverðinum gegn Stjörnumönnum á morgun en þessi hávaxni leikmaður er iðinn við að koma boltanum í netið eftir föst leikatriði.
Athugasemdir