Inter og Napoli skildu jöfn þegar þau mættust í Seríu A í kvöld, en lokakafli leiksins var ótrúlegur.

Jose Callejon hélt að hann væri að tryggja Napoli góðan útisigur þegar hann kom gestunum yfir á 79. mínútu.

Þó var ekki svo, því Fredy Guardin jafnaði metin fyrir heimamenn í Inter einungis þremur mínútum síðar.

Callejon skoraði hins vegar á ný á lokamínútu leiksins og hélt í þetta skiptið svo sannarlega að sigurinn væri í höfn. En allt kom fyrir ekki, Hernanes jafnaði metin fyrir Inter örskömmu síðar og lokatölur 2-2.

Inter fór eftir leikinn upp í 9. sæti deildarinnar en Napoli upp í það sjöunda.