„Það er þvílík stemmning á vellinum alveg eins og þegar við tryggðum okkur sæti á HM," sagði Guðni Bergsson formaður KSÍ við Fótbolta.net á fréttamannafundinum í dag.

„Það eru bjartir tímar, við erum að fá verulegan stuðning frá stjórnmálunum að það sé nauðsynlegt að endurbyggja Laugardalsvöll. Við höfum átt mjög gott samstarf með ríkisstjórninni og Reykjavíkurborg," hélt Guðni áfram.

Guðni kynnti á fréttamannafundinum tvær tillögur að nýjum leikvangi, aðra sem kostar 5 milljarða og er með stúku allan hringinn, aðra sem er með stúku allan hringinn og þaki yfir leikvanginn sem kostar 8 milljarða.

„Okkur finnst dýrari útgáfan vera skynsamlegri. Það býður upp á meira og við getum verið öruggir með leikdagana í mars og nóvember. Auk þess getum við boðið upp á margt annað á vellinum og þrátt fyrir að þetta sé dýrari kostur þá er hann skynsamlegri og ég vona að það verði ofan á. Mér heyrist fólk hallast frekar að þeim valkosti."

Guðni sagði að það myndi taka tvö ár að byggja völlinn og ef ákvörðun væri tekin á næsta ári væri verið að horfa á að í byrjun ársins 2020 væri raunhæft að spila fyrsta heimaleikinn.

„Planið er að völlurinn tæki 20 þúsund manns en það snýst að því að það er nauðsynlegt að leikvangurinn geti hýst 25 þúsund manna tónleika sem gerir þá að verkum að við getum verið með stærstu tónleikaatriðin sem fara um Evrópu og víðar hérna,"

Margar stórhljómsveitir hafa aldrei komið til Íslands enda ekki aðstæður til að taka þær allra stærstu hingað, margir horfa til Guns N'Roses, U2 og Rolling Stones en hvað myndi Guðni vilja sjá?

„Ég væri til í að sjá Stevie Wonder," sagði Guðni og bætti við að það væri aldrei spurning hvort hann gæti tekið 20 þúsund manns á völlinn.

Nánar er rætt við Guðna í sjónvarpinu hér að ofan.