Markahrókurinn Jonathan Glenn tryggði Breiðabliki torsóttan sigur á 10 mönnum KA í Fifunni í dag en leikurinn var annar leikur liðanna í Lengjubikarnum í ár.

KA varð fyrir áfalli strax í upphafi leiks þegar Davíð Rúnar Bjarnason fékk að líta rauða spjaldið á 4. mínútu og vítaspyrna dæmd sem Atli Sigurjónsson skoraði úr.

Þrátt fyrir að vera manni færri jafnaði Elfar Árni Aðalsteinsson metin fyrir KA snemma í síðari hálfleik gegn sínum gömlu félögum.

Það var svo ekki fyrr en þegar 12 mínútur voru eftir af leiknum að Breiðablik náði að klára leikinn en þá skoraði Jonathan Glenn annað mark þeirra og tryggði 2-1 sigur.

Þetta voru fyrstu stig Breiðablik en liðið tapaði 1-3 gegn Fylki í fyrsta leik. KA hafði unnið 8-0 sigur á Fjarðabyggð í fyrsta leik.