Kári í 3. deildinni hefur fengið góðan liðsstyrk en Eggert Kári Karlsson hefur skrifað undir félagaskipti frá ÍA.

Hinn 26 ára gamli Eggert Kári, á 96 leiki fyrir ÍA í deild og bikar. Þar af eru 46 leikir í efstu deild. Ljóst er að hann mun koma með góða reynslu inn í ungt og sprækt lið Kára sem hefur undanfarin ár verið byggt á ungum strákum af Skaganum í bland við eldri og reynslumeiri leikmenn.

Þetta verður fyrsta tímabil Eggerts þar sem að hann spilar ekki með uppeldisfélagi sínu ÍA, en hann hóf meistaraflokksferil sinn þar árið 2009 þá 18 ára gamall.

Ljóst var að Eggert væri á leiðinni frá ÍA en Gunnlaugur Jónsson þjálfari Skagamanna staðfesti það í við Fótbolta.net í október síðastliðinn. Nú er ljóst að hann er á leiðinni í þriðju deildina og mun leika áfram á Skaganum nema með Kára í þetta skiptið.