Hörður lék sinn fyrsta leik með Ólafsvíkingum í 2-1 tapi gegn Val í Lengjubikarnum í gærkvöldi.

„FH er með breiðan hóp og mér fannst ég þurfa að fá mínútur. Ólafsvíkingar voru áhugasamir og vonandi er þetta það sem koma skal, að maður fái að spila 90 mínútur með alvöru lið."

Hörður er 18 ára gamall og ennþá gjaldgengur í 2. flokk. Hann vildi hins vegar komast í meistaraflokks bolta. „Mér fannst ég þurfa að komast í fullorðins bolta. Ég er búinn að spila fjögur ár í öðrum flokki og fannst tími kominn á að taka skrefið fram á við."

Hörður er á ferð og flugi þessa dagana en hann er nýkominn heim úr æfingaferð með FH. Í nótt fer hann með U21 árs landsliðinu til Georgíu og síðan fer hann í æfingaferð með Víkingi Ólafsvík til Spánar.

„Ég er svo heppinn að fá að fara í tvær æfingaferðir. Í nótt förum við til Georgíu og spilum tvo leiki þar og svo förum við til Ítalíu og spilum við Sádi-Arabíu. Það eru spennandi tímar framundan," sagði Hörður.

Hörður var í starfskynningu á Fótbolta.net fyrir þremur árum en þá tók hann meðal annars viðtal við skemmtikraftinn Björn Braga Arnarsson. Mynd af þeim félögum má sjá hér að neðan.