Rúnar Páll Sigmundsson, þjálfari Stjörnunnar, var ánægður með sína stráka þrátt fyrir 3-0 tap gegn stórliði Inter í kvöld.
Lestu um leikinn: Stjarnan 0 - 3 Inter
,,Frammistaðan sem slík var mjög góð í alla staði. Leikmennirnir gerðu það sem við lögðum upp með og spiluðu agaða vörn," sagði Rúnar Páll við fjölmiðla eftir leik.
,,Við fengum ágætis upphlaup í seinni hálfleik þegar við fórum framar en síðan kom þetta þriðja mark sem er ágætis mark. Við náðum ekki að setja pressu í því marki."
,,Heilt yfir var þetta frábær frammistaða og og frábær stemning á vellinum. Ég hef aldrei upplifað annað eins."
,,Ég hef komið á Laugardalsvöll á landsleiki síðan ég var lítill drengur en ég hef aldrei upplifað svona stemningu. Það er frábært fyrir leikmennina að upplifa þetta og þetta fer allt í reynslubankann."
Síðari leikurinn fer fram í næstu viku og Rúnar viðurkennir að möguleikar Stjörnunnar séu ekki miklir.
,,Við förum út og reynum að gera okkar besta. Það verður erfitt að vinna upp þriggja marka forystu en það er allt hægt í þessu. Við förum út með gleðina í fyrirrúmi og leikskipulag. Það verður ævintýri að spila á frábærum velli."
Hér að ofan má sjá viðtalið í heild sinni.
Athugasemdir