Ítalska úrvalsdeildin, Sería A, er farin að rúlla. Núna voru að klárast sjö leikir í deildinni, en 1. umferð kláraðist með þessum leikjum.

Bæði Mílanó-liðin, AC og Inter, hefja þetta tímabil á sigri.

AC Milan, sem hefur styrkt sig rosalega í sumar, vann Crotone á útivelli 3-0. Crotone spilaði manni færri frá fimmtu mínútu og eftirleikurinn var auveldur fyrir Milan-menn. Franck Kessie, Patrick Cutrone og Suso skoruðu mörkin fyrir AC Milan.

Nágrannar AC í Inter unnu líka 3-0. Þeir höfðu betur gegn Fiorentina. Mauro Icardi skoraði tvö fyrstu mörk Inter í leiknum og Ivan Perisic, sem hefur verið sterklega orðaður við Manchester United, skoraði þriðja markið. Hann er víst ekki á förum frá Inter.

Nýliðar Spal náðu í stig gegn Lazio. Bologna og Torino skildu jöfn, rétt eins og Sassuolo og Genoa, og þá vann Sampdoria lið Benevento, en Fabio Quagliarella skoraði bæði mörk Sampdoria í leiknum.

Landsliðsmaðurinn Emil Hallfreðsson spilaði allan leikinn í tapi Udinese gegn Chievo. Ekki góð byrjun hjá Emil og félögum.