Breiðablik sótti stigin þrjú til Ólafsvíkur í Pepsi-deild karla í kvöld.

Blikar, sem höfðu tapað tveimur leikjum í röð fyrir leikinn í kvöld, byrjuðu leikinn af miklum krafti og voru ekki lengi að ná forystunni. Gísli Eyjólfsson skoraði fyrsta markið með frábæru skoti.

Sveinn Aron Guðjohnson kom inn í byrjunarlið Breiðabliks og honum tókst að tvöfalda forystuna fimm mínútum fyrir leikhlé.

Það var síðan ekki mikið búið af seinni hálfleiknum þegar Aron Bjarnason gerði út um leikinn. Hann skoraði þriðja markið á 53. mínútu og þar við sat. Öruggur sigur Blika staðreynd.

Lokatölur 3-0 og Breiðablik er núna í áttunda sæti með 21 stig. Ólsarar eru með 19 stig.