,,Það eru búnar að vera ein, tvær svefnlausar nætur í sumar," sagði Bjarki Már Árnason þjálfari Tindastóls eftir 4-0 tap gegn Leikni í dag en liðið var þegar fallið úr deildinni.
Lestu um leikinn: Leiknir R. 4 - 0 Tindastóll
,,Sumarið er samt búið að vera lærdómsríkt og ég er samt mjög ánægður með liðið mitt. við höfum lagt okkur fram og reynt að spila fótbolta og verið að gera fína hluti inn á milli."
Þó enginn hafi búist við miklu af Tindastóli byrjaði mótið vel hjá þeim og þeir voru að stríða liðum og nálægt því að vinna leiki þó enginn hafi unnist en fjögur jafntefli fengu þeir.
,,Þetta féll ekki alveg með okkur, sérstaklega framan af en ég gef kredit til minna stráka þeir eru mjög flottir í þessu. Ég vona að flestir þeirra taki baráttuna með okkur á næsta ári. Ég veit að einhverjir eru að spá í hreyfingu en vona að bróðurhlutinn haldi áfram. Þetta eru ungir strákar og hafa framtíðina fyrir sér."
Orðrómur hefur verið uppi um að Tindastóll ætli ekki að vera með lið í 2. deildinni og jafnvel fara í þá neðstu. En verða þeir með í 2. deildinni í sumar?
,,Ég ætla rétt að vona það. Ég verð ansi svekktur ef við förum í gegnum svona strembið tímabil og gefumst svo upp og förum eitthvað annað. Ég á ekki von á öðru, ég yrði mjög svekktur ef þetta er eitthvað annað en það," sagði Bjarki en verður hann sjálfur áfram með liðið?
,,Ég hef ekki hugmynd um það. Það var stefnt á að klára þetta tímabil og svo held ég að menn séu ekki farnir að spá í hinu. Þetta kemur í ljós, hvort ég hafi tíma eða hvort félagið vilji halda mér."
Athugasemdir