Heimild: Sky Sports
Van Gaal segir það ekki hjálpa United í deildinni að vera ekki í evrópukeppni
Louis van Gaal, knattspyrnustjóri Manchester United telur að sú staðreynd að liðið sé ekki í meistaradeildinni á þessu tímabili minnki möguleika liðsins á því að vinna ensku úrvalsdeildina.
Hann er því augljóslega ósammála Jose Mourinho, stjóra Chelsea sem kvartaði yfir því á síðasta tímabili að Liverpool hefði forskot á keppinauta sína í ensku deildinni þar sem liðið tók ekki þátt í Evrópukeppni.
Van Gaal sér hlutina í öðru ljósi. ,,Ég tel það best að spila reglulega við bestu lið heims, frekar en að æfa margsinnis í viku," sagði van Gaal í viðtali við Sky Sports.
,,Af því leiðir að ég tel að betra sé að vera í meistaradeildinni, því þar keppirðu reglulega á móti sterkum andstæðingum. Við sáum í vikunni að öll ensku liðin fengu alvöru leiki. Öll liðin hafa góða hópa, ekki bara 16 góða leikmenn heldur fleiri en 25 og því er mikilvægt að halda taktinum."
Athugasemdir
