Elín Metta Jensen er á sínum stað í landsliðshópi Íslands sem fær það verðuga verkefni að mæta Þýskalandi í undankeppni Heimsmeistaramótsins kl. 14:00 að íslenskum tíma í dag. Við hjá Fótbolta.net náðum tali af framherjanum knáa fyrir æfingu íslenska liðsins á Brita-leikvanginum í gær. Það er ljóst að um erfiðan leik verður að ræða fyrir stelpurnar okkar en aðspurð sagðist Elín Metta ekki finna fyrir miklu stressi.
„Nei, ég get ekki sagt að maður finni fyrir því. Ég held það sé meira einhverskonar eftirvænting og gleði yfir því að vera komnar saman.“
„Mér finnst allir vera frekar rólegir og við höfum fundið fyrir því undanfarna daga. Ég held að besta ráðið til að stilla spennuna sé að hafa svolítið gaman af þessu og ég held að okkur eigi eftir að takast það.“
Um kaffileytið í gær var búið að selja 3.500 miða á leikinn en Þjóðverjar eiga von á enn fleirum á Brita-leikvanginn sem tekur rúmlega 12.000 manns. Hvernig er að eiga von á svo fjölmennum stuðningshópi andstæðinganna?
„Það væri ótrúlega gaman að hafa fleiri íslenska áhorfendur hér en staðreyndin er sú að það eru fleiri Þjóðverjar á vellinum og mér finnst bara gaman að fá marga áhorfendur á leikinn. Það er bara skemmtilegt og stemmning. Sama með hvaða liði þeir halda.“
Að lokum spurðum við Elínu Mettu hvort hún gerði ekki tilkall í byrjunarliðssæti eftir frábæra frammistöðu gegn Færeyjum í fyrsta leik undankeppninngar.
„Allir sem eru í þessum hóp vonast til þess að byrja þennan leik og ég er engin undantekning þar,“ svaraði Elín Metta en hægt er að horfa á allt viðtalið við hana í spilaranum hér að ofan.
Athugasemdir