Heimild: Reuters
Sepp Blatter forseti FIFA er með einföld skilaboð til þeirra sem vilja ekki að Heimsmeistaramótið í fótbolta fari fram í Rússlandi árið 2018; 'Haldið ykkur heima!'
Blatter kom til Rússlands í gær og skoðaði þar leikvanginn í Sochi sem notaður verður á mótinu.
,,Ef nokkrir pólitíkusar eru ekki sérlega ánægðir með að við skulum halda Heimsmeistaramótið í Rússlandi, þá segi ég alltaf við þá; 'Nú jæja, haldið ykkur á heima'," sagði Blatter við fréttamenn en hann hitti Vladimir Putin Rússlandsforseta við þetta tilefni.
Mótið verður haldið í 11 borgum í Rússlandi og undirbúningur er í fullum gangi. Blatter er hæstánægður með undirbúninginn og gefur honum fimm stjörnur.
Fyrr í mánuðinum skoraði hópur bandarískra þingmanna á FIFA að hætta við að halda mótið í Rússlandi vegna hlutdeildar þeirra í stríðsástandinu í Úkraínu. Petro Poroshenko Úkraínuforseti vill líka að hætt verði við að halda mótið í Rússlandi nema Rússar dragi herlið sitt til baka.
Athugasemdir