,,Mér líst ótrúlega vel á þetta. Undirbúningurinn hefur gengið mjög vel. Það kom mér á óvart að vera valinn í hópinn, ef ég á að vera alveg hreinskilin. En ég hef beðið eftir þessu lengi," sagði Arna Sif Arngrímsdóttir leikmaður Þórs/KA sem er nýliði í landsliðshópnum sem mætir Danmörku í undankeppni HM á fimmtudaginn næstkomandi, á Laugardalsvelli.
,,Ég veit í rauninni lítið um þetta danska lið. Ég er að renna svolítið blint í sjóinn. En þetta verður spennandi," sagði Arna Sif sem segir að stelpurnar í hópnum hafi tekið vel á móti sér.
,,Ég hef spilað með flestum í hópnum í yngri landsliðunum, svo ég þekki þær flestar. Það eru margar að spila hérna heima í deildinni," sagði Arna Sif.
,,Ég vonast auðvitað eftir að fá tækifærið í leiknum. Ég býst við því að við bjóðum upp á eitthvað skemmtilegt. Það er mjög mikilvægt að fá stuðning og við hvetjum alla til að mæta," sagði Arna Sif.
Viðtalið í heild sinni er hægt að sjá í sjónvarpinu hér að ofan.
Athugasemdir