Gunnar Heiðar Þorvaldsson skoraði annað mark leiksins er Häcken lagði Oskarshamns af velli í sænska bikarnum.

Leikurinn var umspilsleikur um hvort liðið kæmist í lokakeppni sænska bikarsins og voru Gunnar Heiðar og félagar ekki í miklum vandræðum.

Staðan var markalaus fram að 69. mínútu þegar miðjumaðurinn Sebastian Ohlsson kom gestunum sem eru í Evrópubaráttunni í efstu deild í Svíþjóð yfir.

Tíu mínútum síðar var Gunnar Heiðar búinn að tvöfalda forystuna og voru það René Makondele frá Kongó og sænski framherjinn Alexander Jeremejeff sem gulltryggðu sigurinn á lokamínútunum.