Björn ræddi við Fótbolta.net á æfingu Íslands í Kaliforníu þar sem leikið verður gegn Mexíkó í vináttulandsleik á föstudagskvöld, leikurinn verður klukkan 2 að íslenskum tíma aðfaranótt laugardags.

Björn Bergmann færði sig um set í janúarglugganum síðasta, yfirgaf Molde og gekk í raðir Rostov í Rússlandi. Þar spilar hann með tveimur öðrum íslenskum landsliðsmönnum; Ragnari Sigurðssyni og Sverri Inga Ingasyni.

„Það hefur verið mjög gaman síðan ég kom þangað. Það hefur hjálpað mikið að hafa Ragnar og Sverri. Ég veit ekki hvort ég gæti þetta án þeirra!"

Björn er hæstánægður innan vallar sem utan og segir að það hafi gert sér gott að komast í sterkari deild og er ánægður með hvernig sér hefur gengið persónulega í fyrstu leikjunum í Rússlandi.

Hann telur að Rússarnir muni skila góðu heimsmeistaramóti í sumar.

„Miðað við það sem ég hef séð hingað til þá verður þetta geggjað. Þetta er risastórt. Þeir vilja allt fyrir mann gera. Tungumálið gæti reynst Íslendingum erfitt, það er enginn sem talar góða ensku þarna. Við erum alltaf með túlk með okkur og svo er Raggi orðinn frekar góður í rússneskunni."

Viðtalið er í heild sinni í sjónvarpinu hér að ofan.