„Það var ekki verið að leggjast í skotgrafir allan leikinn og gott að komast á gras. Gott gras, höfðingjalegar móttökur og sprækt Eyjalið sem ógnaði með hraða sínum og krafti. Við fengum virkilega góðan leik út úr þessu," sagði Óli að leikslokum.

„Það er að ástæðulausu að vera að trufla dómarann eitthvað. Hann sinnti starfi sínu eftir bestu getu og vitund og skapaði bara fínan og fjörugan leik. Það eru alltaf skoðanir á dómgæslu hér í Eyjum."

Hinn 38 ára gamli Atli Viðar Björnsson skoraði annað mark FH í leiknum býst Óli við að nota hann sem ofurvaramann í sumar. Atli átti ekki sérstakt tímabil síðasta sumar en er markahæsti maður FH á undirbúningstímabilinu.

FH var spáð öðru sæti í árlegri spá Fótbolta.net og er Óli ekki hissa.

„Ég held að það sé alveg eðlileg spá, FH hefur verið ofarlega undanfarin ár og mikið lagt í umgjörð og aðbúnað. Við erum með öflugan hóp þannig það er ekki óeðlilegt að menn haldi áfram að sjá FH á toppnum.

„Eins og þið vitið þá hafa verið breytingar. Ég og við sem stöndum með liðinu vitum að það tekur tíma að fá öll púslin til að falla á réttan stað en það er mjög eðlilegt að gera þessar kröfur."