Birna Berg er í leikmannahópi FH í kvöld.
Birna Berg Haraldsdóttir fyrrverandi unglingalandsliðsmarkvörður Íslands snýr aftur í Pepsi-deildina í kvöld og er í leikmannahópi FH sem mætir Aftureldingu í Kaplakrikanum.
Birna sem er 20 ára gömul landsliðskona í handbolta hefur ekki spilað fótbolta síðan hún spilaði með ÍBV í láni frá FH sumarið 2011 en eftir það meiddist hún í handboltaleik og var lengi frá.
Hún hóf meistaraflokksferli sinn með FH sumarið 2008 og hefur í heildina spilað 58 meistaraflokksleiki og skorað eitt mark sem kom á hennar fyrsta sumri á 15. aldursári.
Hún hefur spilað 37 landsleiki með U19 og U17 ára landsliðum Íslands.
Leikurinn hefst klukkan 19:15 í Kaplakrika og aðgangur áhorfenda er frír á hann í boði Icelandair Cargo.
